سعودی وزارتِ حج و عمرہ نے حج 2026 کے لیے مسلم اقلیتی ممالک کے عازمین کو نسک ایپ کے ذریعے رجسٹریشن کرانے کی سہولت فراہم کرنے کا اعلان کیا ہے۔ وزارت نے واضح طور پر کہا ہے کہ ان ممالک کے عازمین صرف سرکاری نسک حج پلیٹ فارم پر براہِ راست رجسٹریشن کرائیں گے، کیونکہ یہ پلیٹ فارم حج کے براہِ راست پروگرام کے تحت واحد سرکاری اور مجاز نظام ہے۔
رجسٹریشن کا عمل hajj.nusuk.sa ویب سائٹ پر جا کر مکمل کیا جا سکتا ہے، جہاں عازمین اپنی رہائش کے ملک، رابطہ تفصیلات اور شناختی دستاویزات درج کر کے اندراج کریں گے۔ ہر درخواست دہندہ اپنے 7 خاندانی افراد کو بھی رجسٹریشن میں شامل کر سکتا ہے۔
درخواست جمع کرانے کے بعد، امیدوار سسٹم میں لاگ ان کر کے اپنی درخواست کی حیثیت دیکھ سکتے ہیں۔ تاہم، اس مرحلے میں صرف رجسٹریشن کی سہولت فراہم کی جائے گی، جبکہ پیکجز کی بکنگ اور دیگر مراحل کے شیڈول بعد میں جاری کیے جائیں گے۔
وزارتِ حج و عمرہ نے یہ بھی بتایا کہ جو افراد حج گائیڈ یا خدمات فراہم کرنے والے عملے کے طور پر رجسٹریشن کرنا چاہتے ہیں، وہ بھی نسک ایپ کے ذریعے درخواست دے سکتے ہیں۔
نسک حج ایک ڈیجیٹل سسٹم ہے جو عازمین کو رجسٹریشن، پیکج کے انتخاب، ادائیگی، رہائش، اور حرمین شریفین کے درمیان ٹرانسپورٹیشن تک تمام سہولیات فراہم کرتا ہے۔ اس سسٹم پر لائیو چیٹ، ای میل اور کال سینٹر کے ذریعے مدد بھی فراہم کی جا رہی ہے۔
