تھائی لینڈ نے کمبوڈیا کے ساتھ امریکی ثالثی میں طے پانے والے امن معاہدے پر عملدرآمد اس وقت تک معطل کر دیا ہے جب تک اس کے مطالبات پورے نہیں ہوتے۔ یہ فیصلہ سرحد کے قریب بارودی سرنگ کے دھماکے میں دو تھائی فوجیوں کے زخمی ہونے کے بعد کیا گیا۔
تھائی وزیراعظم انوتن چانویراکل کا کہنا ہے کہ معاہدے کے تحت تمام اقدامات روک دیے گئے ہیں، تاہم انہوں نے مطالبات کی تفصیل نہیں بتائی۔
کمبوڈیا نے ردعمل میں کہا ہے کہ وہ معاہدے پر کاربند ہے۔ یہ معاہدہ جولائی کی سرحدی جھڑپوں کے بعد پائیدار امن کے لیے کیا گیا تھا، جن میں 40 سے زائد افراد ہلاک اور 3 لاکھ لوگ بے گھر ہوئے تھے۔
یہ معاہدہ اکتوبر میں ملائیشیا میں امریکی صدر کی موجودگی میں طے پایا تھا، مگر تھائی لینڈ اسے باضابطہ امن معاہدہ تسلیم کرنے سے پہلے ہی شکوک و شبہات کا اظہار کر چکا ہے۔ دونوں ممالک ایک دوسرے پر بارودی سرنگیں بچھانے کے الزامات بھی لگاتے رہے ہیں۔
