ایشیا کپ رائزنگ اسٹارز میں پاکستان شاہینز نے بھارت اے کو یکطرفہ مقابلے کے بعد شکست دے کر سیمی فائنل کے لیے کوالیفائی کرلیا۔ دوحا میں کھیلے گئے گروپ میچ میں پاکستان نے ٹاس جیت کر فیلڈنگ کا فیصلہ کیا جو مؤثر ثابت ہوا۔
بھارت اے کی ٹیم 19 اوورز میں 136 رنز بنا کر آؤٹ ہوگئی۔ سوریا ونسی نے 45 جبکہ نمن دھیر نے 35 رنز اسکور کیے۔ بھارت کی آخری 8 وکٹیں صرف 45 رنز کے اضافے پر گریں۔
پاکستان کی جانب سے شاہد عزیز نے 24 رنز کے عوض 3 وکٹیں حاصل کیں، معاذ صداقت اور سعد مسعود نے دو دو جبکہ سفیان مقیم، عبید شاہ اور احمد دانیال نے ایک ایک وکٹ لی۔
ہدف کے تعاقب میں پاکستان شاہینز نے 13.2 اوورز میں 2 وکٹوں کے نقصان پر 137 رنز بنا کر میچ آسانی سے اپنے نام کرلیا۔ معاذ صداقت نے شاندار 79 رنز کی ناقابلِ شکست اننگز کھیلی جس میں 7 چوکے اور 4 چھکے شامل تھے۔ محمد فائق بھی 16 رنز بنا کر ناٹ آؤٹ رہے۔
یہ پاکستان شاہینز کی ٹورنامنٹ میں دوسری کامیابی ہے۔ ٹیم اپنا اگلا گروپ میچ 18 نومبر کو متحدہ عرب امارات کے خلاف کھیلے گی۔
