بین الاقوامی شہرت یافتہ ریسلر جان سینا نے اپنے طویل اور یادگار کیریئر کے بعد ورلڈ ریسلنگ انٹرٹینمنٹ سے ریٹائرمنٹ کا اعلان کر دیا۔
اپنے آخری میچ میں جان سینا کو گنٹر کے ہاتھوں شکست کا سامنا کرنا پڑا، اور وہ اپنے کیریئر کا اختتام ٹیپ آؤٹ کے ساتھ کرتے ہوئے جذباتی لمحے کا سامنا کر گئے۔
میچ کے دوران جان سینا نے اپنے مشہور گانے کے ساتھ رنگ میں انٹری دی، لیکن حریف ریسلر گنٹر پہلے موجود تھے اور فوری حملہ کر دیا۔ جان سینا نے اپنے مخصوص اسٹائل سے جواب دیا مگر فتح حاصل نہ کر سکے۔
میچ کے اختتام پر سینا نے اپنے بینڈز اتار کر اسٹیج پر رکھے اور بوجھل قدموں کے ساتھ واپس چلے گئے، جس پر مداح بھی دکھ کا اظہار کرتے نظر آئے۔
جان سینا نے 2001 میں ریسلنگ کی دنیا میں قدم رکھا اور اپنے کیریئر کے دوران 17 بار ورلڈ چیمپئن بننے کا اعزاز حاصل کیا۔
