کراچی میں سندھ اسمبلی سے خطاب کرتے ہوئے وزیراعلیٰ سندھ مراد علی شاہ نے سندھ کو تقسیم کرنے اور کراچی کو الگ کرنے سے متعلق بیانات کی مذمت کی ہے۔
انہوں نے کہا کہ پاکستان کے قیام میں سندھ کا بنیادی کردار تھا اور اسی شہر میں سندھ اسمبلی موجود تھی۔ ان کے مطابق پاکستان کے دشمن ملک کی وحدت کو نقصان پہنچانے کی مہم چلا رہے ہیں۔
مراد علی شاہ نے کہا کہ یہ پہلا موقع نہیں کہ اس نوعیت کی باتیں کی گئی ہوں، 1994 میں بھی سندھ اسمبلی اسی نوعیت کی قرارداد منظور کر چکی ہے۔ انہوں نے کہا کہ 1948 میں کراچی کو دارالحکومت بنانے کے وقت آئین موجود نہیں تھا، اگر آئین ہوتا تو فیصلہ مختلف ہو سکتا تھا۔ ان کا کہنا تھا کہ اس طرح کا کوئی بھی فیصلہ اسمبلی کی دو تہائی اکثریت سے ہی ممکن ہے۔
وزیراعلیٰ سندھ نے کہا کہ قرارداد میں سندھ کی وحدت کی بات کی گئی ہے اور کسی جماعت یا شخصیت پر تنقید نہیں کی گئی۔ انہوں نے ارکانِ اسمبلی سے اپیل کی کہ اگر کسی کو اعتراض ہے تو وہ سامنے لائے، بصورت دیگر قرارداد کی حمایت کی جائے۔
انہوں نے تاریخی پس منظر بیان کرتے ہوئے کہا کہ برصغیر پر انگریزوں کے قبضے کے بعد سندھ کو ممبئی پریزیڈنسی کا حصہ بنایا گیا، تاہم سندھ کے عوام نے جدوجہد کے بعد علیحدگی حاصل کی۔
مراد علی شاہ نے مزید کہا کہ آصف علی زرداری کی جانب سے ’’پاکستان کھپے‘‘ کا نعرہ دیا گیا تھا اور پاکستان پیپلز پارٹی ملک کی وحدت کے خلاف کبھی نہیں جائے گی۔ انہوں نے کہا کہ سندھ کو توڑنے کی کوئی بھی سوچ کامیاب نہیں ہوگی۔
