وزیراعظم شہباز شریف نے پاکستان سپر لیگ سیزن 11 کے تینوں پلے آف میچز میں شائقین کو اسٹیڈیم آنے کی اجازت دے دی ہے۔
چیئرمین پاکستان کرکٹ بورڈ محسن نقوی نے سوشل میڈیا بیان میں بتایا کہ کراچی اور لاہور میں ہونے والے پلے آف میچز کے دوران تماشائیوں کو اسٹیڈیم میں داخلے کی اجازت ہوگی۔
محسن نقوی کے مطابق وزیراعظم نے ہدایت کی ہے کہ شائقین اسٹیڈیم آنے کے لیے پبلک ٹرانسپورٹ کا استعمال کریں تاکہ ٹریفک کے مسائل سے بچا جا سکے اور سکیورٹی انتظامات مؤثر بنائے جا سکیں۔
واضح رہے کہ اس سے قبل وزیراعظم کی جانب سے پی ایس ایل 11 کے فائنل میچ کے لیے بھی تماشائیوں کو اسٹیڈیم میں شرکت کی اجازت دی جا چکی تھی، جس کے بعد اب پلے آف مرحلے میں بھی شائقین کو میچز براہ راست دیکھنے کا موقع ملے گا۔
