اسلام آباد: سکیورٹی ذرائع کا کہنا ہے کہ بھارت مقبوضہ کشمیر میں اپنے مقاصد حاصل کرنے میں ناکام رہا، اسی لیے اب آزاد کشمیر میں انتشار اور بدامنی پھیلانے کی کوششیں کی جا رہی ہیں۔
اعلیٰ سکیورٹی حکام نے صحافیوں سے گفتگو کرتے ہوئے کہا کہ آزاد کشمیر میں بعض عناصر نے حقوق کی تحریک کے نام پر ریاست مخالف بیانیے کو فروغ دینے کی کوشش کی۔ ان کے مطابق حکام کو پہلے سے معلوم تھا کہ جے اے اے سی (جوائنٹ عوامی ایکشن کمیٹی) کے بعض اقدامات کے پیچھے کیا مقاصد کارفرما ہیں۔
سکیورٹی ذرائع نے کہا کہ ریاست ہمیشہ مسائل کے حل کے لیے مذاکرات اور سیاسی عمل کو ترجیح دیتی ہے، تاہم قانون شکنی اور ریاست مخالف سرگرمیوں کے خلاف آئینی اور قانونی کارروائی کی جائے گی۔ ان کا کہنا تھا کہ آزاد کشمیر حکومت عوامی مسائل کے حل کے لیے سیاسی اور جمہوری طریقہ کار پر عمل پیرا ہے۔
ذرائع کے مطابق پاکستان اپنے قومی مفادات، کشمیر کاز اور داخلی استحکام کے تحفظ کے لیے ہر ممکن اقدامات جاری رکھے گا جبکہ دہشت گردی اور بیرونی مداخلت کے خلاف کارروائیاں بھی جاری رہیں گی۔
