لاہور: صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے مون سون بارشوں کے 11ویں اسپیل کا الرٹ جاری کر دیا۔ ترجمان کے مطابق 16 سے 19 ستمبر تک دریاؤں کے بالائی علاقوں میں بارشوں کی پیشگوئی ہے۔
ڈی جی پی ڈی ایم اے عرفان علی کاٹھیا کا کہنا ہے کہ بارشوں کے باعث ندی نالوں میں طغیانی کا خدشہ ہے، اسی لیے وزیر اعلیٰ پنجاب کی ہدایات کے مطابق صوبے بھر کے کمشنرز اور ڈپٹی کمشنرز کو الرٹ رہنے کی ہدایات جاری کر دی گئی ہیں۔
محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک سمیت متعلقہ اداروں کو بھی الرٹ جاری کیا گیا ہے۔
عرفان کاٹھیا نے شہریوں کو خبردار کرتے ہوئے کہا کہ دریاؤں کے کناروں پر جانے اور خراب موسم میں سیروتفریح سے گریز کریں، آندھی یا طوفان کی صورت میں محفوظ مقامات پر رہیں اور غیر ضروری سفر نہ کریں۔
انہوں نے مزید کہا کہ ایمرجنسی کی صورت میں پی ڈی ایم اے ہیلپ لائن 1129 پر فوری رابطہ کیا جا سکتا ہے۔
