سندھ کے وزیر بلدیات سعید غنی نے کہا ہے کہ کراچی سمیت صوبے کے مختلف شہروں میں ممکنہ مون سون بارشوں سے نمٹنے کے لیے انتظامات مکمل کر لیے گئے ہیں۔
کراچی میں پریس کانفرنس سے خطاب کرتے ہوئے انہوں نے کہا کہ شدید بارشوں کے باعث شہری سیلاب کے امکانات ہیں، تاہم حکومت اور اداروں نے پہلے ہی اقدامات کر لیے ہیں تاکہ عوام کو کم سے کم مشکلات کا سامنا ہو۔
محکمہ موسمیات کے مطابق 22 اگست تک کراچی، حیدرآباد، سکھر، لاڑکانہ اور دیگر شہروں میں گرج چمک کے ساتھ بارش کا امکان ہے۔ شہر کے مختلف علاقوں میں گزشتہ روز ہلکی بارش بھی ریکارڈ کی گئی۔
وزیر بلدیات نے مزید کہا کہ مقامی کونسلوں کو ہدایت کی گئی ہے کہ اپنے وسائل بروئے کار لاتے ہوئے نکاسی آب اور دیگر مسائل پر فوری کام کریں، خاص طور پر ان علاقوں میں جہاں ماضی میں پانی جمع ہونے کے مسائل زیادہ سامنے آتے ہیں۔
انہوں نے عوام اور اپوزیشن جماعتوں سے اپیل کی کہ مشکل وقت میں سیاسی تنقید کے بجائے عوام کی مدد پر توجہ دی جائے۔
یاد رہے کہ گزشتہ ماہ صوبے کے مختلف اضلاع میں بارشوں کے باعث کرنٹ لگنے اور چھتیں گرنے کے واقعات میں کم از کم چھ افراد جاں بحق ہو گئے تھے۔
