جامعہ کراچی کی سنڈیکیٹ نے قبضہ شدہ اراضی فوری واگزار کرانے اور مزید قبضے سے بچانے کے لیے سیکیورٹی گارڈز تعینات کرنے کا فیصلہ کر لیا۔
وائس چانسلر ڈاکٹر خالد محمود عراقی کی زیر صدارت خصوصی اجلاس میں اراضی واگزار کرانے کے لیے متعلقہ اداروں سے فوری رابطے کی منظوری دی گئی۔ اجلاس میں یہ بھی طے پایا کہ اس مقصد کے لیے تجربہ کار لیگل فرم کی خدمات حاصل کی جائیں گی۔
مزید برآں، پانچ رکنی کمیٹی قائم کر دی گئی ہے جو لیگل فرم کو ضروری معلومات فراہم کرے گی۔ اجلاس میں اراضی کے تحفظ کے لیے خصوصی گارڈز کی مستقل تعیناتی کی بھی منظوری دی گئی۔
وائس چانسلر نے کہا کہ جامعہ کی زمین کے تحفظ پر کوئی سمجھوتہ نہیں ہوگا اور میڈیا و سول سوسائٹی کے کردار کو سراہا۔
