دریائے چناب کے بپھرنے سے ملتان کی تحصیل جلالپور پیر والا شدید متاثر ہوئی ہے۔ تحصیل کے 90 فیصد نواحی علاقے زیرِ آب آچکے ہیں جبکہ اوچ شریف سپر ہائی وے پر شگاف مزید بڑا ہوگیا ہے۔ ہنگامی بنیادوں پر متاثرہ آبادی کا انخلاء جاری ہے۔
وزیرِ اعلیٰ مریم نواز شریف کی ہدایت پر سینیئر وزیر مریم اورنگزیب اور دیگر وزراء جلالپور پیر والا میں ریسکیو آپریشن کی نگرانی کر رہے ہیں۔ مریم اورنگزیب خود اسپیکر کے ذریعے لوگوں کو انخلاء کی ہدایات دیتی رہیں جبکہ کمشنر ملتان اور دیگر حکام بھی صبح 6 بجے سے جاری آپریشن میں شریک ہیں۔
ہیڈ پنجند پر دریائے چناب میں پانی کا بہاؤ 6 لاکھ 60 ہزار کیوسک تک پہنچ گیا ہے اور اس میں اضافہ ہو رہا ہے۔ تاہم، ہیڈ تریموں پر پانی کا بہاؤ 1 لاکھ 78 ہزار کیوسک تک کم ہوگیا ہے۔ اسی طرح، خانکی ہیڈ ورکس پر 92 ہزار اور قادر آباد پر 94 ہزار کیوسک پانی گزر رہا ہے۔
دریائے ستلج میں سلیمانکی کے مقام پر پانی کا بہاؤ 1 لاکھ 24 ہزار کیوسک ہے۔ دریائے راوی پر گنڈا سنگھ والا کے مقام پر 1 لاکھ 82 ہزار کیوسک ریکارڈ کیا گیا ہے، جبکہ جسر پر 23 ہزار، شاہدرہ پر 31 ہزار، بلوکی پر 63 ہزار اور ہیڈ سدھنائی پر 78 ہزار کیوسک ہے، جہاں پانی کی سطح میں کمی جاری ہے۔
ڈی جی پی ڈی ایم اے کے مطابق، مون سون بارشوں کی شدت میں کمی سے دریاؤں کے بہاؤ میں نمایاں کمی آ رہی ہے اور بالائی علاقوں میں بھی بارش رک چکی ہے۔
