پاکستان اور بین الاقوامی ایٹمی توانائی ایجنسی کے درمیان جوہری تعاون فریم ورک کا نیا معاہدہ طے پا گیا ہے، جو 2026 سے 2031 تک قابلِ عمل رہے گا۔
یہ پاکستان اور آئی اے ای اے کے درمیان پانچواں کنٹری پروگرام فریم ورک ہے، جس پر چیئرمین پاکستان اٹامک انرجی کمیشن ڈاکٹر راجہ علی رضا انور اور آئی اے ای اے کے ڈپٹی ڈائریکٹر جنرل نے دستخط کیے۔
فریم ورک کے تحت جوہری سائنس اور ٹیکنالوجی کو براہِ راست سماجی و اقتصادی ترقی کے لیے استعمال کیا جائے گا، جبکہ خوراک و زراعت، انسانی صحت و غذائیت، ماحولیاتی تبدیلی و آبی وسائل کا انتظام، جوہری توانائی اور تابکاری و جوہری تحفظ جیسے کلیدی شعبوں میں تعاون ہوگا۔
ڈاکٹر راجہ علی رضا انور نے کہا کہ یہ معاہدہ پاکستان کے پرامن جوہری سائنس و ٹیکنالوجی کے عزم کا اعادہ ہے اور آئی اے ای اے کے تعاون سے خوراک، صحت، توانائی اور ماحولیات کے شعبوں میں جدید ٹیکنالوجی کا استعمال جاری رہے گا۔
