سندھ ہائیکورٹ نے ٹی ایم سی گڈاپ اور ابراہیم حیدری کے درمیان ٹیکس وصولی کے تنازع سے متعلق توہین عدالت کی درخواست پر چیئرمین ٹی ایم سی ابراہیم حیدری سمیت چھ افسران کو معطل کر دیا ہے۔
عدالت میں سماعت کے دوران درخواست گزار کے وکیل احمد مسعود ایڈووکیٹ نے مؤقف اختیار کیا کہ عدالت نے پہلے ہی حکم دیا تھا کہ ٹیکس وصولی کا تنازع وزیر اعلیٰ سندھ کے روبرو حل کیا جائے، تاہم ٹی ایم سی ابراہیم حیدری نے عدالتی حکم کے برعکس جامشورو کے مقام پر غیر قانونی چنگی قائم کر رکھی ہے۔
وکیل نے بتایا کہ ناظر کی رپورٹ میں بھی غیر قانونی چنگی کی موجودگی کی تصدیق ہو چکی ہے اور عدالت کے احکامات کی خلاف ورزی جاری ہے۔
عدالت نے چیئرمین ٹی ایم سی ابراہیم حیدری، ٹاؤن میونسپل کمشنر، ڈائریکٹر ٹیکس، ڈپٹی ڈائریکٹر، ٹیکس افسر اور کانٹریکٹر کو معطل کرتے ہوئے آئندہ سماعت تک شوکاز نوٹس کے جواب جمع کرانے کی ہدایت کر دی۔
