اسلام آباد: سابق چیئرمین ایف بی آر شبر زیدی نے دارالحکومت کو اسلام آباد سے لاہور منتقل کرنے کی تجویز دے دی۔ لاہور میں اپنی خودنوشت “32 آنکر روڈ” کی تقریبِ رونمائی سے خطاب میں انہوں نے اعتراف کیا کہ وہ ایف بی آر میں اصلاحات نہیں لا سکے۔
شبر زیدی نے مذہبی جماعتوں کی سیاست پر پابندی کا مطالبہ کرتے ہوئے کہا کہ ماضی میں لاہور کمیونسٹوں اور نیشنلسٹوں کا شہر تھا لیکن لبرل سوچ کو ختم کرکے اسے نقصان پہنچایا گیا۔
تقریب کے مقررین نے شبر زیدی کی کتاب کو ایک دیانت دار اور صاف گو شخص کی تحریر قرار دیتے ہوئے کہا کہ اس میں ملک کے معاشی اور سماجی ڈھانچے کی خامیوں کو نمایاں کیا گیا ہے۔
معروف صحافی حسین نقی نے کہا کہ پاکستان میں جمہوریت کا امکان ختم ہوچکا ہے۔ سابق گورنر اسٹیٹ بینک اور پنجاب کے قائم مقام وزیر خزانہ شاہد حفیظ کاردار کا کہنا تھا کہ آئی ایم ایف مسائل کی بنیادی وجہ ہے اور ایف بی آر میں ساختی اصلاحات کی سخت ضرورت ہے۔
