امریکا کے نائب صدر جے ڈی وینس ایران کے ساتھ اہم مذاکرات میں امریکی وفد کی سربراہی کے لیے میری لینڈ سے پاکستان روانہ ہو گئے۔
اسلام آباد کیلئے روانگی سے قبل ایئرپورٹ پر میڈیا سے گفتگو کرتے ہوئے جے ڈی وینس نے کہا کہ وہ امریکی صدر ڈونلڈ ٹرمپ کی ہدایات کے تحت مذاکرات میں شرکت کر رہے ہیں اور انہیں امید ہے کہ ایران کے ساتھ بات چیت مثبت انداز میں آگے بڑھے گی۔
انہوں نے کہا کہ اگر ایرانی قیادت نیک نیتی کے ساتھ مذاکرات میں شامل ہوئی تو امریکا بھی کھلے دل سے پیش رفت کے لیے تیار ہوگا۔ تاہم، اگر ایران نے سنجیدگی کا مظاہرہ نہ کیا یا چالاکی سے کام لینے کی کوشش کی تو امریکی وفد کی جانب سے مثبت ردعمل نہیں دیا جائے گا۔
واضح رہے کہ امریکا اور ایران کے درمیان یہ مذاکرات پاکستان کی ثالثی میں کل اسلام آباد میں ہوں گے۔
امریکی وفد میں نائب صدر جے ڈی وینس، نمائندہ خصوصی اسٹیو وٹکوف اور صدر ٹرمپ کے داماد جیرڈ کشنر شامل ہیں، جبکہ ایرانی وفد کی قیادت وزیر خارجہ عباس عراقچی کریں گے، جن کے ہمراہ ایرانی پارلیمنٹ کے اسپیکر باقر قالیباف بھی موجود ہوں گے۔
