پشاور: خیبرپختونخوا میں میٹرک کے امتحانات میں ناقص نتائج سامنے آنے پر ورکرز ویلفیئر بورڈ نے بڑا اقدام اٹھاتے ہوئے 15 ورکنگ فولکس گرائمر اور ہائرسیکنڈری اسکولز کے پرنسپلز کو معطل کر دیا۔ اس حوالے سے باضابطہ اعلامیہ بھی جاری کر دیا گیا ہے۔
اعلامیے کے مطابق معطل ہونے والے اداروں میں ورکنگ فولکس گرائمر اسکول اکوڑہ خٹک، امان گڑھ، غوری والا، ہری پور ٹو، حطار، کرک، کوہاٹ ون، کوہاٹ ٹو، پشاور ٹو، مردان، شہباز عزمت خیل، صوابی اور سوات شامل ہیں۔
اسی طرح ورکنگ فولکس گرائمر اسکول تحت بھائی اور ورکنگ فولکس گرائمر ہائرسیکنڈری اسکول کے پرنسپل بھی ناقص کارکردگی کے باعث عہدے سے ہٹا دیے گئے ہیں۔
اعلامیے کے مطابق معطل پرنسپلز کی ذمہ داریاں عارضی طور پر وائس پرنسپلز اور سینئر اساتذہ کے سپرد کر دی گئی ہیں تاکہ تعلیمی سرگرمیاں متاثر نہ ہوں۔
