شنگھائی: چین کے صوبہ شنگھائی میں ایک انوکھا مقدمہ سامنے آیا جہاں ایک جوڑے نے بچے کے خاندانی نام پر اختلاف کے باعث طلاق کا کیس دائر کر دیا۔ شوہر چاہتا تھا کہ بچے کو اس کے خاندان کا نام دیا جائے، جب کہ بیوی چاہتی تھی کہ بچے کو اس کے خاندان کا نام ملے تاکہ عورت کے خاندان کی شناخت بھی آگے بڑھے۔
دونوں فریق اپنے موقف پر سختی سے ڈٹے رہے اور صلح نہ ہو سکی، جس کے بعد معاملہ عدالت تک پہنچ گیا۔ شنگھائی کی عدالت نے ماں کے حق میں فیصلہ سناتے ہوئے بچوں کی کفالت ماں کو دے دی۔ عدالت نے کہا کہ بچے کے بہتر مفاد اور پرورش والدین کی انا سے زیادہ اہم ہے۔
چین میں روایتی طور پر بچوں کا خاندانی نام ہمیشہ والد کے ساتھ منسوب کیا جاتا رہا ہے، تاہم حالیہ برسوں میں زیادہ سے زیادہ جوڑے بچوں کو ماں کا خاندانی نام دینے لگے ہیں، خاص طور پر دوسری یا تیسری اولاد کے لیے۔ ماہرین کا کہنا ہے کہ یہ تبدیلی چین میں خاندانی نظام اور صنفی برابری کی بڑھتی ہوئی سوچ کی عکاس ہے۔
