ابوظبی میں کھیلے گئے ایشیا کپ 2025 کے سپر فور مرحلے کے اہم ترین میچ میں پاکستان نے سری لنکا کو 5 وکٹوں سے شکست دے دی۔ گرین شرٹس نے 134 رنز کا ہدف 18ویں اوور میں ہی حاصل کرلیا۔
سری لنکا نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 133 رنز بنائے۔ کامندو مینڈس نے 50 رنز کی نمایاں اننگز کھیلی جبکہ باقی بیٹرز پاکستانی باؤلرز کے سامنے جم نہ سکے۔ شاہین شاہ آفریدی نے 3، حارث رؤف اور حسین طلعت نے 2، 2 جبکہ ابرار احمد نے ایک وکٹ حاصل کی۔
ہدف کے تعاقب میں پاکستان کا ٹاپ آرڈر ایک بار پھر ناکام رہا اور 57 رنز پر چار کھلاڑی پویلین لوٹ گئے۔ صاحبزادہ فرحان نے 24، فخر زمان نے 17، کپتان سلمان علی آغا نے 5 اور صائم ایوب صرف 2 رنز بنا سکے۔
مشکل صورتحال میں محمد نواز اور حسین طلعت نے چھٹی وکٹ پر 58 رنز کی شاندار شراکت قائم کی۔ محمد نواز نے 24 گیندوں پر 38 رنز بنائے جن میں 3 چھکے اور 3 چوکے شامل تھے جبکہ حسین طلعت نے 30 گیندوں پر 32 رنز کی ذمہ دارانہ اننگز کھیلی۔
پاکستان نے دو اوورز قبل ہی ہدف حاصل کرلیا اور سپر فور مرحلے میں اپنی پہلی کامیابی سمیٹی۔ اس فتح کے ساتھ پاکستان کے فائنل تک رسائی کے امکانات بھی روشن ہوگئے ہیں۔
