لاہور: چیئرمین پاکستان کرکٹ بورڈ (پی سی بی) محسن نقوی نے سابق کپتان وسیم اکرم کو ایچ بی ایل پاکستان سپر لیگ (پی ایس ایل) کا برانڈ ایمبیسڈر مقرر کرنے کا اعلان کر دیا ہے۔
لاہور میں پریس کانفرنس کرتے ہوئے محسن نقوی نے کہا کہ پی ایس ایل ختم ہونے کے بعد ملتان سلطانز کی نیلامی ہوگی اور پی ایس ایل 11 میں اس ٹیم کو پی سی بی خود آپریٹ کرے گا۔ انہوں نے مزید کہا کہ علی ترین اگر نئی ٹیم کی بولی میں کامیاب ہوں گے تو وہ ٹیم کے مالک بن سکتے ہیں۔
چیئرمین پی سی بی نے بتایا کہ پی ایس ایل کا آغاز اب 26 مارچ کے بجائے 23 مارچ سے کیا جا سکتا ہے، یہ فیصلہ تمام فرنچائزز کی مشاورت سے کیا جائے گا۔ وسیم اکرم پی ایس ایل کے لیے کام کریں گے اور 8 جنوری کو دو نئی ٹیموں کی نیلامی کے دوران موجود ہوں گے۔
محسن نقوی نے کہا کہ نئی ٹیموں کے لیے 10 پارٹیوں نے کوالیفائی کیا ہے اور 8 جنوری کو اسلام آباد میں نیلامی ہوگی۔ انہوں نے بھارتی کھلاڑیوں کے انڈر 19 ایشیا کپ میں نامناسب رویے پر بھی آئی سی سی کو خط لکھنے کا اعلان کیا اور کہا کہ وزیر اعظم نے واضح کیا ہے کہ کھیل میں سیاست نہیں ہونی چاہیے۔
